Sipas rezultateve të përditësuara nga Komisioni Qendror i Zgjedhjeve ka ndryshime në ndarjen e mandateve në Kuvendin e Kosovës, raporton Gazeta “Enigma”.
Eugen Cakolli nga Demokracia në Veprim përmes një postimi në profilin e tij në Facebook ka thënë se VV mund të kalojë në 58 mandate vetëm nëse arrin rreth 80%* të votave të mbetura me postë, ose edhe më pak pikë të përqindjes, në rast se LDK bie nën ~8%.
Ndërsa PDK mund të rikthehet në 23 mandate sipas Cakollit vetëm nëse shënon një përmirësim të dukshëm të performancës (mbi ~13-14%), dhe njëkohësisht LVV ose LDK performojnë më dobët se deri tani.
“KQZ ka përfunduar numërimin e të 92 kutive të votimit me postë – rreth 26,500 vota – të cilat tashmë janë përfshirë në rezultatin kumulativ. Por kjo është VETËM RRETH GJYSMA e votave me postë, sepse nga nesër, do të verifikohen dhe numërohen edhe rreth 20 mijë vota të tjera me postë. Pas përfshirjes së votave me postë deri më tani, LVV ka fituar një mandat shtesë, duke kaluar në 57 mandate, ndërsa PDK ka rënë në 22 mandate. Ky ndryshim është rezultat i performancës së LVV-së në (rreth 72%), por edhe i performancës gati tre-fish më të dobët të LDK-së në votat me postë, krahasuar me zgjedhjet e 9 shkurtit”, ka shkruar Cakolli.
“Mandati i 57-të i LVV-së është fituar me diferencë minimale, meqenëse aktualisht, koeficienti i LVV-së është vetëm rreth 4 pikë më i lartë se ai i PDK-së, që në terma realë përkthehet në afërsisht ~160 vota diferencë në nivel kombëtar për atë mandat – një diferencë që statistikisht ende nuk e konsolidon përfundimisht atë ulëse për LVV-në”, tha ai.
“Me rreth 20 mijë vota të tjera me postë dhe afërsisht 10 mijë vota me kusht ende për t’u numëruar, ndryshime në shpërndarjen e mandateve janë të mundshme vetëm nëse këto vota devijojnë ndjeshëm nga trendet aktuale. Konkretisht, skenarët e mundshëm (jo-definitiv) janë: LVV mund të kalojë në 58 mandate vetëm nëse arrin rreth 80%* të votave të mbetura me postë, ose edhe më pak pikë të përqindjes, në rast se LDK bie nën ~8%; dhe PDK mund të rikthehet në 23 mandate vetëm nëse shënon një përmirësim të dukshëm të performancës (mbi ~13-14%), dhe njëkohësisht LVV ose LDK performojnë më dobët se deri tani. Në të kundërtën, shpërndarja aktuale e mandateve pritet të mbetet e pandryshuar: 57-22-15-6”, ka përfunduar ai.
