Ministri i Kulturës, Rinisë dhe Sportit, Hajrullah Çeku, ka reaguar ashpër ndaj largimit të flamurit të Republikës së Kosovës nga Kongresi i UEFA-s në Beograd, duke e cilësuar këtë veprim si të turpshëm, të papranueshëm dhe të dënueshëm, shkruan Gazeta Enigma.
Ai theksoi se Kosova është shtet i pavarur dhe përfaqësohet në arenën ndërkombëtare përmes simboleve shtetërore, ndërsa Federata e Futbollit të Kosovës është anëtare me të drejta të plota e UEFA-s.
“Largimi i simboleve është sulm i drejtpërdrejtë ndaj integritetit shtetëror të Kosovës dhe nuk mund të kalojë pa një reagim të mirëfilltë ndërkombëtar,” deklaroi Çeku, duke kërkuar sqarime nga UEFA dhe veprime konkrete për adresimin e përgjegjësisë për këtë shkelje.
Ministri dënoi gjithashtu gjuhën e përdorur nga Federata e Futbollit të Serbisë në komunikatën e saj, duke e cilësuar atë si një instrument të politikave shoviniste serbe.
“Shteti serb nuk ka ndryshuar. Është i njëjti që ka kryer masakra dhe gjenocid para pak dekadash dhe nuk e ka kursyer as sportin,” theksoi Çeku.
Ai bëri thirrje që federatat europiane dhe botërore të sportit të mos organizojnë ngjarje sportive në Serbi, për aq kohë sa ky shtet nuk ndryshon qasjen e tij ndaj pjesëmarrjes së Kosovës në garat ndërkombëtare./GazetaEnigma/
Postimi i plotë:
