Çitaku i përgjigjet Kurtit: Sulmon opozitën për të shmangur llogaridhënien për dështimet e Qeverisë

Çitaku i përgjigjet Kurtit: Sulmon opozitën për të shmangur llogaridhënien për dështimet e Qeverisë

Deputetja e PDK-së, Vlora Çitaku, i është përgjigjur Kurtit pas sulmeve që ky i fundit sot ua ka bërë partive e deputetëve të opozitës rreth çështjes së votimit të Albulena Haxhiut për kryekuvendare.

Çitaku ka thënë se Kurti në vend se të japë llogari për dëmtimin e ekonomisë dhe prodhuesve vendorë dhe në vend të se të përgjigjet për aferat e panumërta korruptive, ka zgjedhur të sulmojë opozitën, duke e etiketuar si patriarkale dhe të prapambetur.

Postimi i plotë:

“Albin Kurti, në vend që të japë llogari për dëmtimin e ekonomisë dhe prodhuesve vendorë,

në vend që të përgjigjet për aferat e panumërta korruptive të qeverisë së tij,

në vend që të sqarojë përfshirjen e vëllait të Luan Dalipit në pazare me shitblerjen e energjisë, ka zgjedhur, si zakonisht, të sulmojë opozitën, duke e etiketuar si patriarkale dhe të prapambetur.

Ironike, kur dihet që PDK ishte partia e parë që propozoi një grua për Presidente të vendit, Flora Brovinën, dhe në vazhdimësi ka mbështetur gratë në pozita të larta politike dhe publike.

PDK ka saktësuar që nuk i voton Ministrat e Qeverisë Kurti 2. Ndërkohë, në grupin parlamentar të VV ka edhe rreth 40 deputetë tjerë, mes tyre edhe shumë gra. Le të bëjë ndonjë propozim tjetër.

E ndërkohë, LVV ka një histori krejt tjetër:

– Valdete Dakën, e sulmuan deri në shkarkim.

– Vlora Hysenin, e sulmuan dhe e shkarkuan.

– Gresa Cakën, e sulmuan brutalisht, vetëm pse s’mund ta shkarkonin.

Ky është realiteti. Jo propaganda.”

Kryeministri në detyrë, Albin Kurti, ka kritikuar deputetë të partive që në legjislaturën e kaluar ishin në opozitë, për mosvotimin e kandidates së VV-së, Albulena Haxhiu, për kryetare të Kuvendit të Kosovës.

Ai e ka quajtur mosvotimin e Haxhiut jo vetëm luftë politike por edhe gjinore nga partitë e tjera.

“Kjo situatë gjithashtu reflekton përballjen me struktura hierarkike e patriarkale të prapambetura. Lufta kundër kryetares së GVV, Albulena Haxhiu nuk është vetëm përplasje politike apo partiake, por edhe përballje gjinore”, theksoi ai.

Related Articles