Pak pas orës 10:00 të mëngjesit të së mërkurës, një delegacion zyrtarësh sauditë mbërriti në Krahun Perëndimor të Shtëpisë së Bardhë me një mesazh për administratën amerikane.
Ministri i Mbrojtjes, Khalid bin Salman, në një vizitë të paparalajmëruar në Washington, përcolli një mesazh nga vëllai i tij, princi i kurorës së Arabisë Saudite, si për presidentin Donald Trump ashtu edhe për zëvendëspresidentin JD Vance, se Arabia Saudite dëshiron uljen e tensioneve në luftën me Iranin dhe se zgjatja e konfliktit mbart rreziqe të mëdha, sipas personave të njohur me bisedimet.
Një ditë më parë, një tjetër i dërguar kishte hyrë nga e njëjta derë me një mesazh krejt tjetër. Kryeministri izraelit Benjamin Netanyahu, gjatë takimit me Trumpin në Zyrën Ovale, shprehu skepticizëm se diplomacia me Iranin do të sillte rezultate, sipas zyrtarëve izraelitë. Në vend të kësaj, të dy diskutuan opsionet për ta shtuar presionin ndaj Iranit, përfshirë rifillimin e një lufte në shkallë të plotë, thanë ata.
Takimet njëri pas tjetrit këtë javë ishin planifikuar rastësisht. Megjithatë, ato nxjerrin në pah presionet dhe mesazhet e kundërta me të cilat përballet Trump, ndërsa kërkon një rrugëdalje nga një konflikt që ka zgjatur shumë më tepër sesa afati që ai kishte parashikuar, shkruan CNN.
Ndërsa po shtohet presioni nga republikanët për t’i dhënë fund luftës, konflikti në fakt duket se po zgjerohet, me fronte të reja që po hapen me pothuajse çdo vend në rajon tashmë i përfshirë. Përpjekjet diplomatike, në rastin më të mirë, po ecin me vështirësi; një zyrtar i lartë amerikan tha se rifillimi i diplomacisë së drejtpërdrejtë me Iranin nuk duket i afërt.
