Presidenti i Këshillit Evropian, Antonio Costa, tha sot se dialogu është e vetmja mënyrë për të kapërcyer dallimet midis BE-së dhe Serbisë, dhe për këtë arsye vendosi të vizitojë Serbinë.
“E vetmja mënyrë për t’u përballur me dallimet është të flasim dhe të kuptojmë njëri-tjetrin, të kuptojmë se çfarë duhet të bëjmë së bashku. Kjo është arsyeja pse jam këtu, shumë më thanë të mos vij, por vendosa të vij sepse nëse kemi një problem me Serbinë, nëse kemi një problem me Presidentin Vuçiq, zgjidhja nuk është ‘mos ejani’ dhe ‘mos flisni’, por që unë të vij, të flas, të shpjegoj pikëpamje të ndryshme, të dëgjoj prej tij se Serbia është plotësisht e përkushtuar në rrugën evropiane”, u tha ai gazetarëve në Beograd.
Ai theksoi se nuk duhet humbur më shumë kohë, sepse duhet të rikthehet besimi i qytetarëve në Ballkanin Perëndimor në procesin e integrimit evropian.
“Ka shumë njerëz në Bruksel dhe në vende të tjera që gjithashtu nuk besojnë se ju jeni vërtet të përkushtuar për t’u bashkuar me BE-në, por e vetmja mënyrë për të kapërcyer këtë situatë është që të dyja palët të japin rezultate”, tha ai.
Duke komentuar largimin e Vuçiqit për në Moskë për të festuar Ditën e Fitores, pavarësisht mesazheve nga Brukseli për të mos e bërë këtë, ai tha se presidenti serb i shpjegoi se kishte shkuar për të festuar ngjarje nga e kaluara.
“Por aktualisht, Serbia është plotësisht e përkushtuar ndaj procesit të pranimit në BE dhe e di se për këtë duhet të kemi koordinim të plotë në politikën e përbashkët të jashtme dhe të sigurisë. Ne nuk mund ta ndryshojmë historinë, e kuptoj plotësisht këtë, që Serbia feston çlirimin, por ne nuk mund ta festojmë atë pa dënuar pushtimin e sotëm të një vendi tjetër”, tha ai.
Ai theksoi gjithashtu se dialogu midis Serbisë dhe Kosovës është thelbësor, ashtu si edhe një dënim i qartë i pushtimit rus të Ukrainës.
“Topi tani është në fushën tuaj dhe ju lutem të mos humbasim kohë sepse e ardhmja nuk do të presë, prandaj le ta hapim këtë grup dhe të vazhdojmë me integrimin e suksesshëm të Serbisë në BE”, tha ai.
