Drejtoresha e Arsimit në Gjakovë Eranda Kumnova-Baci, ka kritikuar ministren e Arsimit Arbërie Nagavci, pasi tha se gjatë kësaj jave nga Ministria e Arsimit nuk kanë marrë asnjë telefonatë, komunikim apo vizitë, pas rasteve ku 20 nxënëse u vetlënduan duke provuar sfidat e TikTok-ut.
Reagimi i Kumnova-Bacit vjen pas postimit të Nagavcit në Ditën e Vajzave, e cila ka shkruar se si Qeveri dhe Ministri e Arsimit “iu kemi në vëmendje si asnjëherë më parë”.
“Ministre e Arsimit, për Ditën e vajzave paske shkruar që: ‘Si Qeveri dhe Ministri e Arsimit iu kemi në vëmendje si asnjëherë më parë’. Në cilën vëmendje ministre? Në vëmendjen tënde duhen të ishin prioritet 20 vajza të vetlënduara nga qyteti yt i lindjes? Në vëmendjen tuaj duhet të ishte një vizitë në Gjakovë, një takim me shkollat, krijimi i një task force, masa të shpejta, takim me drejtoret e drejtorive për Arsim të të gjitha komunave. Kjo duhej të ishte vëmendja juaj për ditën e vajzave. Sepse në tërë këtë javë jo të mirë për shkollat tona, nga Ministria që udhëhiqni ju, nuk kemi marrë asnjë telefonatë, asnjë komunikim dhe asnjë vizitë, kur duhej të ishte temë e përbashkët kjo. Dhe fjalia juaj ‘Le të vazhdojmë të mbështesim dhe fuqizojmë vajzat tona’ nuk duhej të ishte fare në postimin tuaj, sepse e keni dhënë provimin tuaj për ‘mbështetje’ këtë javën e fundit!”, shkroi drejtoresha e Arsimit në Gjakovë.
Ndërkohë, përpos në Gjakovë, sot u raportua se edhe në Kamenicë janë lënduar 15 nxënëse duke e provuar këtë sfidë. /Gazeta Enigma
