Edhe kryeministri kanadez Justin Trudeau, kryeministrja e Italisë Giorgia Meloni, dhe ish-kryeministri britatik Boris Johnson, arritën në Kiev, me rastin e dyvjetorit të fillimit të luftës Rusi-Ukrainë.
Trudeau përmes një postimi në X (ish-Twitter), tha se mbështetja e Kanadasë për popullin ukrainas mbetet “e palëkundur”.
“Për të riafirmuar këtë mbështetje, unë jam në Kiev me CAFreeland [Zëvendëskryeministrja kanadeze dhe ministrja e financave Chrystia Freeland] dhe BillBlair [Ministri kanadez i Mbrojtjes Kombëtare Bill Blair].”
Ish-kryeministri britanik Boris Johnson, tha se s’ka dyshim që Ukraina do ta fitojë luftën.
“Në këtë dyvjetor të zymtë të pushtimit të Putinit, jam i nderuar që jam këtu në Ukrainë. Me guximin e tyre të paepur, nuk kam asnjë dyshim se ukrainasit do të fitojnë dhe do të dëbojnë forcat e Putinit – me kusht që t’u japim ndihmën ushtarake, politike dhe ekonomike që u nevojitet”, shkroi Johnson në X.
Për t’i qëndruar në krah Ukrainës, në Kiev shkoi edhe presidentja e Komisionit Evropian, Ursula von der Leyen.
“Më shumë se kurrë, ne qëndrojmë fort pranë Ukrainës. Financiarisht, ekonomikisht, ushtarakisht, moralisht. Derisa vendi të çlirohet përfundimisht”, shkroi ajo në X, mëngjesin e sotshëm.
