Presidenti turk Recep Tayyip Erdogan ka thënë të premten se turqit duhet të mbajnë të gjitha kursimet e tyre në lira dhe se luhatshmëria e fundit e kursit të këmbimit ishte kryesisht nën kontroll pasi lira u dobësua ndjeshëm në dy muajt e fundit.
“Unë dua që të gjithë qytetarët e mi t’i mbajnë kursimet e tyre në paratë tona, të drejtojnë të gjithë biznesin e tyre me paratë tona dhe unë e rekomandoj këtë”, u shpreh Erdogan në një fjalim në Stamboll.
“Të mos e harrojmë këtë: përderisa nuk i marrim paratë tona si pikë referimi, jemi të dënuar të fundosemi. Lira turke, paratë tona, janë ato me të cilat do të shkojmë përpara. Jo me këtë valutë, atë monedhe e huaj”.
Duke iu drejtuar një grupi biznesi, Erdogan u bëri thirrje gjithashtu turqve që të sjellin kursimet e tyre në sistemin bankar dhe përsëriti pikëpamjen e tij joortodokse se normat e interesit ishin shkaku i inflacionit.
“Për disa kohë, ne kemi zhvilluar betejën për të shpëtuar ekonominë turke nga cikli i normave të larta të interesit dhe inflacionit të lartë, dhe duke e çuar atë në rrugën e rritjes përmes investimeve, punësimit, prodhimit, eksporteve dhe suficitit të llogarisë korente. Normat e interesit ulen, normat e interesit rriten. Miqtë e mi, na lejoni ta heqim këtë nga librat tanë. Normat e interesit i bëjnë të pasurit më të pasur dhe të varfërit më të varfër”, vijoi Erdogan.
Të ardhurat e turqve janë gërryer në muajt e fundit për shkak të rënies së lirës, megjithëse ajo u rikthye nga niveli më i ulët historik prej 18.4 kundrejt dollarit javën e kaluar pas prezantimit të një skeme shtetërore për të mbrojtur depozitat lokale nga humbjet e zhvlerësimit kundrejt valutave të forta.
Kriza e lirës u shkaktua nga ulja agresive e normës së interesit të bankës qendrore, që arrin në 500 pikë bazë që nga shtatori, e kryer nën presionin e Erdoganit si pjesë e një përpjekjeje për të nxitur kredinë dhe eksportet./Gazeta “Enigma”/
