Policia e Bashkimit Evropian, Europol, tha të enjten se kishte shkatërruar një bandë kriminale që kontrabandonte vietnamezë në Evropë, me destinacion përfundimtar Britaninë nëpërmjet anijeve të vogla përtej Kanalit.
Europoli tha se kishte kryer tetë arrestime dhe kishte sekuestruar pasaporta, automjete dhe para në një operacion të udhëhequr nga Franca që u zhvillua më 30 mars.
Midis të arrestuarve ishte një udhëheqës rrjeti i ndaluar në Gjermani sipas një urdhër-arresti evropian. Policia arrestoi një tjetër organizator të nivelit të lartë në Hungari përpara operacionit në fund të muajit të kaluar, raporton Euronews.com
Vietnamezët hynë në Zonën Shengen pa kufij të BE-së në Hungari, me viza afatshkurtra ose leje qëndrimi, përpara se të udhëtonin për në Francë me aeroplan.
Pasi mbërritën në Francë, ata u mbajtën për një farë kohe në Paris përpara se të transportoheshin në Francën veriore dhe t’i dorëzoheshin një grupi kurdo-irakinian që organizoi kalimin e rrezikshëm të Kanalit me varka të vogla.
