Presidentit të Rusisë, Vladimir Putin, i është hequr rripi i zi i nderit në Taekwondo nga organi qeverisës ndërkombëtar i sportit, për shkak të pushtimit të Ukrainës nga vendi i tij.
Ndërsa trupat ruse grumbullohen jashtë Kievit dhe qindra mijëra refugjatë ukrainas ikin në vendet fqinje, liderët botërorë kanë grumbulluar sanksione ekonomike ndëshkuese ndaj Putinit dhe aleatëve të tij më të afërt, si dhe bizneseve të lidhura me Rusinë.
Bota e sportit ka pasur një reagim të ngjashëm: Rusia u përjashtua nga kualifikimet për Kupën e Botës të futbollit të këtij viti dhe Komiteti Olimpik Ndërkombëtar (IOC) u ka kërkuar federatave të përjashtojnë atletët nga Rusia, si dhe nga aleati i saj Bjellorusia.
‘Taekwondo Botërore’, e cila qeveris federatat ndërkombëtare për këtë sport, ishte e fundit që dënoi Putinin, duke thënë të martën se veprimet e Moskës ishin kundër vizionit të sportit: “Paqja është më e çmuar se triumfi”.
“Në këtë aspekt, Taekwondo Botërore ka vendosur të tërheqë rripin e zi të nderit që i është dhënë z. Vladimir Putin në nëntor 2013”, tha organi me bazë në Seul në një deklaratë zyrtare.
Ai shtoi se ngjarjet zyrtare të taekwondo-së nuk do të organizohen në Rusi apo Bjellorusi.
Në përputhje me nxitjen e IOC-së, flamujt dhe himnet e të dy vendeve gjithashtu nuk do të shfaqen apo luhen në ngjarjet e taekwondo-së në mbarë botën.
“Mendimet e Taekwondo-së Botërore janë me popullin e Ukrainës dhe ne shpresojmë për një fund paqësor dhe të menjëhershëm të kësaj lufte”, thuhet në deklaratë.
