Një person pa shenja jete është gjetur sot në lumin Shkumbin pranë zonës së Katundit të Ri në Elbasan, raporton Gazeta “Enigma”.
Kufoma është gjetur nga një peshkatar lokal, i cili njoftoi menjëherë banorët përreth dhe më pas autoritetet. Forcat e policisë kanë mbërritur në vendngjarje dhe kanë rrethuar zonën për të garantuar sigurinë dhe ruajtjen e provave.
Për shkak të terrenit të vështirë dhe qasjes së kufizuar, është kërkuar ndihma e njësisë së polumbarëve dhe shërbimit zjarrfikës të Elbasanit për të nxjerrë trupin nga uji dhe për ta transportuar drejt morgut të spitalit rajonal.
Ende nuk ka informacion mbi identitetin, gjininë apo moshën e viktimës, ndërsa ekspertiza mjeko-ligjore pritet të japë detaje të mëtejshme. Policia nuk përjashton asnjë pistë, përfshirë mbytjen aksidentale apo një ngjarje të mundshme kriminale.
Autoritetet u bëjnë thirrje qytetarëve që kanë informacion për ndonjë person të zhdukur të kontaktojnë menjëherë policinë. Hetimet janë në fazën fillestare.
