Gjykata Themelore në Prishtinë ka vendosur të caktojë një masë paraburgimi prej një muaji për Hasan Krasniqin, kryeshefin e KRU “Gjakova”, i cili u arrestua pas një aksioni të organizuar nga Krimet Ekonomike në bashkëpunim me Prokurorinë Speciale.
Lajmin e ka konfirmuar zëdhënësja e gjykatës, Mirlinda Gashi, për Gazetën Enigma. Sipas njoftimit të Prokurorisë Speciale, Hasan Krasniqi dyshohet për kryerjen e veprës penale “Keqpërdorim i pozitës apo autoritetit zyrtar”.
“Prokuroria Speciale e Republikës së Kosovës në bashkëpunim me Drejtorinë për Hetimin e Krimeve Ekonomike dhe Korrupsionit, përkatësisht Njësinë Rajonale për Hetimin e Krimeve Ekonomike e Korrupsionit në Gjakovë, kanë realizuar sot një operacion policor në Gjakovë. Operacioni policor ka rezultuar me arrestimin e një personi H.K., të dyshuar për veprën penale “Keqpërdorim i pozitës apo autoritetit zyrtar” nga neni 414 i KPRK-së, i cili me vendim të prokurorit nga PSRK është ndaluar për 48 orë”, u tha në përgjigjen e Prokurorisë Speciale.
Hasan Krasniqi, kryeshefi i KRU “Gjakova”, ishte arrestuar në Bullgari në gusht të vitit të kaluar, pas një urdhër-arresti ndërkombëtar të lëshuar nga Policia italiane. Arrestimi ishte bërë për dyshimet se ai ishte i përfshirë në trafikimin me qenie njerëzore.
Në zgjedhjet lokale të vitit 2021, ai ishte kandidat i Lëvizjes Vetëvendosje për Asamblenë Komunale të Gjakovës, por nuk kishte arritur të sigurojë mjaftueshëm vota për të qenë pjesë e saj.
Në zgjedhjet lokale të vitit 2021, ai garoi për një vend në Asamblenë Komunale të Gjakovës si kandidat i Lëvizjes Vetëvendosje, por nuk arriti të sigurojë mjaftueshëm vota për t’u zgjedhur. Në janar të vitit 2022, mori postin e kryeshefit ekzekutiv të KRU “Gjakova”.
