Shkolla fillore “8 Marsi” në Pejë së fundmi ka mbetur pa disa laptopë, televizorë e një sasi të parave që u plaçkitën nga hajnat.
Drejtori i shkollës, Turhan Bajraktari, këtë e cilëson si problem shqetësues pasi mungesa e pajisjeve do të shkaktojë problem në organizimin e procesit mësimorë.
“Dëmet janë evidente. Ishim në përgatitje për procesin mësimorë për fazën tjetër të pandemisë dhe të kalojmë në mësimin online. Ata televizorë mezi i kemi sigurua. Kanë participua edhe prindërit”, deklaroi për RTV Dukagjinin, Bajraktari.
Bajraktari ka një ide si shkolla duhet të jetë më e sigurt ndaj keqbërësve.
“Do të na duhet të vendosim rrjetat edhe pse nuk i preferojmë pasi u ngjasojnë burgjeve. Në këtë rast do të na imponohet t’i mbulojmë dritaret”, shtoi tutje Bajraktari, përcjell Telegrafi.
Me rastin tani janë duke u marrë Policia e Kosovës e cila këtë vepër e kanë konsideruar si vjedhje të rëndë.
“Policia është informuar se në shkollën “8 Marsi” ka ndodhur një vjedhje e rëndë. Njësitet relevante kanë shkuar në vendin e ngjarjes dhe edhe Prokuroria e ka klasifikuar rastin si “vjedhje të rëndë”, deklaroi zëdhënësi i policisë për rajonin e Pejës, Driton Rugova.
Kjo është hera e dytë që shkolla ka qenë cak i hajnave brenda tri ditësh.
