Kryetari i Aleancës për Ardhmërinë e Kosovës Ramush Haradinaj ka reaguar pas vendimit të qeverisë për uljen e pagave për gjyqtarët dhe prokurorët në vend.
Vendimi për rritje të pagave në sistemin gjyqësor dhe prokurorial ishte marrë nga Haradinaj në kohën kur ai ishte kryeministër i Kosovës.
Ai ka thënë se me vendimin e sotëm për ulje pagash në këtë sektor do të shkatërrohet.
Reagimi i plotë:
Kurti ka marrë mision shkatërrimin e shtetit. Pas shkaktimit të rrezikut në veri, ngecjes në dialog dhe prishjes me amerikanët, sot ka vendosur ta shkatërrojë sistemin e drejtësisë.
Me vendimin e qeverisë që të shfuqizohet vendimi im për rritjen e pagave për gjyqtarë dhe prokurorë, nga sot drejtësia do të punojë me paga të përgjysmuara.
Prokurorët dhe Gjyqtarët që çdo ditë mbrojnë shtetin dhe drejtësinë, sot janë goditur nga Kryeministri i shkatërrimit.
Ftoj Kurtin që menjëherë të kthejë pagat e Prokurorëve dhe Gjyqtarëve në nivelin që kanë qenë sepse përndryshe mund të shkatërrohet nga brenda njëri prej segmenteve më të rëndësishëm të një shteti, drejtësia.
Nëse nuk ndalesh pasojat do të jenë të pariparueshme!
