Rastet e vjedhjeve nëpër markete në Kosovë nuk janë të rralla, por jo gjithmonë kapen personat e dyshuar, pasi të njëjtit arrijnë të ikin. Por ndryshe ka ndodhur sot afër marketit ‘Viva Fresh’ në rrugën ‘Ilaz Kodra’ në Prishtinë, ku një person u kap në flagrancë duke vjedhur.
Burimet e Gazetës Sinjali kanë bërë me dije se këtë herë i dyshuari arriti të ikë nga marketi pa u vërejtur, por është kapur posa ka hyrë në veturë. Dikush e raportoi në Polici, me ç’rast një njësi policore intervenoi menjëherë në vendin e ngjarjes.
Sipas informacioneve të para, i dyshuari kishte arritur që t’i marrë pa paguar disa paketime me proshutë në vlere të dhjetëra eurove, pa u zbuluar as nga punëtorët e as nga sigurimi i marketit.
Produktet që iu gjetën janë rikthyer në market, ndërsa i dyshuari është shoqëruar në stacion policor për intervistim dhe ndaj tij është iniciuar rasti ‘Vjedhje’.
Pas përfundimit të procedurave policore Prokurori i Shtetit ka nxjerrë aktvendim që të dyshuarit t’i caktohet masa e ndalimit në kohëzgjatje prej 48 orësh.
