Agjencitë amerikane të spiunazhit besojnë se shpërthimi në një spital në Gaza një javë më parë u shkaktua nga një raketë palestineze që pësoi dështim të motorit dhe u nda në dy pjesë, me njërën që goditi parkingun e spitalit, thanë zyrtarët e inteligjencës të martën.
Duke folur me gazetarët përmes telefonit, zyrtarët e inteligjencës thanë se kishin “besim të lartë” në vlerësimin e tyre se nuk ishte Izraeli ai që hodhi raketën, por ishin më pak të sigurt se cilët militantë palestinezë e hodhën predhën në mbrëmjen e 17 tetorit.
“Ne vlerësojmë me besim të lartë se Izraeli nuk ishte përgjegjës për shpërthimin në spital dhe se militantët palestinezë ishin përgjegjës”, tha një zyrtar i inteligjencës, raporton Skynews.
“Ne vlerësojmë me besim të ulët se Xhihadi Islamik i Palestinës ishte përgjegjës për lëshimin e raketës që ra në spital”, shtuan ata.
Zyrtarët amerikanë kishin treguar më parë se Xhihadi Islamik i Palestinës, ose PIJ, ishte ndoshta përgjegjës dhe Izraeli fajësoi grupin për shpërthimin. Grupi militant ndan qëllimin e Hamasit për të shkatërruar Izraelin, por është më i vogël se Hamasi, i cili sundon Rripin e Gazës.
Dëshmia që tregonte për PIJ bazohej në bisedat e përgjuara midis të dyshuarve “militantë të lidhur me Hamasin”, të cilët dukej se po spekulonin se kush ishte pas lëshimit të raketës, thanë zyrtarët.
