Kreu i mbikëqyrësit bërthamor të OKB-së, Rafael Grossi, tha se sulmet e SHBA-së ndaj Iranit nuk arritën të shkaktojnë dëme totale në programin e tij bërthamor dhe se Teherani mund të rifillojë pasurimin e uraniumit brenda pak muajsh, duke kundërshtuar pretendimet e presidentit Donald Trump se SHBA-të i kanë kthyer ambiciet e Teheranit prapa me dekada.
Komentet e Rafael Grossi duket se mbështesin një vlerësim të hershëm nga Agjencia e Inteligjencës së Mbrojtjes e Pentagonit, e cila sugjeron se sulmet e Shteteve të Bashkuara ndaj vendeve kryesore bërthamore iraniane javën e kaluar nuk i shkatërruan komponentët kryesorë të programit të tij bërthamor dhe me shumë gjasa e kanë shtyrë atë vetëm me muaj.
Ndërsa vlerësimi përfundimtar ushtarak dhe i inteligjencës ende nuk ka ardhur, Trump ka pretenduar vazhdimisht se e ka “zhdukur plotësisht dhe tërësisht” programin bërthamor të Teheranit.
Konflikti 12-ditor midis Izraelit dhe Iranit filloi në fillim të këtij muaji kur Izraeli nisi një sulm të paprecedentë që tha se synonte të parandalonte Teheranin të zhvillonte një bombë bërthamore. Irani këmbëngul se programi i tij bërthamor është për qëllime paqësore.
SHBA-të më pas goditën tre vende kryesore bërthamore iraniane para se të fillonte një armëpushim.
Zyrtarët ushtarakë amerikanë kanë dhënë ditët e fundit disa informacione të reja në lidhje me planifikimin e sulmeve, por nuk kanë ofruar prova të reja për efektivitetin e tyre kundër programit bërthamor të Iranit.
Pas informimeve të klasifikuara këtë javë, ligjvënësit republikanë pranuan se sulmet amerikane mund të mos kenë eliminuar të gjitha materialet bërthamore të Iranit – por argumentuan se kjo nuk ishte kurrë pjesë e misionit të ushtrisë. /Gazeta Enigma
