Janë zhvilluar katër ndeshjet për ditën e sotme në Superligën e Kosovës, në kuadër të javës së tretë.
Gjilani ka shënuar një fitore të madhe, duke mposhtur Prishtinën me rezultat bindës 3-1.
Skuadra e drejtuar nga Ardian Nuhiu dominoi, sidomos pjesën e parë , duke mos lënë hapësirë për rikthim të rivalit nga kryeqyteti.
Me këtë fitore, Gjilani ka 4 pikë, ndërsa Prishtina mbetet në krye me 6 pikë.
Ballkani ka fituar me rezultat 3-1 në udhëtim ndaj Ferizajt.
Kjo ishte fitorja e parë e Ballkanit pas dy barazimeve ndaj Gjilanit dhe Malishevës.
Drenica ka shënuar fitore me rezultat minimal 1-0 në shtëpi ndaj Prishtinës së Re.
Me këtë fitore Drenica shkon në kuotën e katër pikëve, ndërsa Ferizaj ka tri sosh.
Dukagjini ka marrë një fitore të rëndësishme në udhëtim, duke mposhtur Malishevën me rezultat minimal 1-0.
Malisheva mbeti edhe një herë pa fitore, ndërsa Dukagjini arkëtoi tri pikë të vlefshme për të dytën herë këtë sezon.
Me këtë fitore, Dukagjini ngjitet në kuotën e 6 pikëve dhe pozicionohet lartë në tabelë, kurse Malisheva me vetëm një pikë mbetet në vendin e 9-të.
