Departamenti Amerikan i Drejtësisë ka publikuar një aktakuzë penale federale ndaj presidentit venezuelian Nicolás Maduro Moros, duke e akuzuar atë si udhëheqës të një organizate të gjerë narkoterroriste që për dekada ka trafikuar sasi masive kokaine drejt Shteteve të Bashkuara.
Aktakuza është ngritur nga Gjykata Federale e Distriktit Jugor të New Yorkut dhe përfshin akuza për konspiracion për narkoterrorizëm, importim kokaine në SHBA, si dhe posedim dhe përdorim të armëve të rënda në funksion të trafikut të drogës.
Sipas dokumentit zyrtar, Maduro akuzohet se ka përdorur institucionet shtetërore të Venezuelës, përfshirë ushtrinë dhe forcat e sigurisë, për të mbrojtur dhe lehtësuar trafikun ndërkombëtar të drogës në bashkëpunim me grupe të shpallura terroriste, përfshirë FARC dhe organizata të tjera kriminale në Amerikën Latine.
“Që nga ditët e tij të para në qeverinë venezueliane, Maduro ka njollosur çdo detyrë publike që ka mbajtur”, thuhet ndër të tjera në aktakuzë.
Prokuroria amerikane pretendon se veprimtaria kriminale ka nisur që nga fundi i viteve ’90 dhe ka vazhduar edhe gjatë presidencës së Maduros, duke e përshkruar atë si figurën qendrore të ashtuquajturit “Cartel de los Soles”, një rrjet i përbërë nga zyrtarë të lartë politikë dhe ushtarakë venezuelianë.
“Nicolas Maduro Moros, i pandehuri, tani qëndron në krye të një qeverie të korruptuar dhe të paligjshme që, për dekada të tëra, ka shfrytëzuar pushtetin qeveritar për të mbrojtur dhe promovuar aktivitete të paligjshme, përfshirë trafikimin e drogës. Ky trafik droge ka pasuruar dhe rrënjosur elitën politike dhe ushtarake të Venezuelës, përfshirë Ministrin e Brendshëm, Drejtësisë dhe Paqes DIOSDADO CABELLO RONDON, i pandehur dhe ish-Ministrin e Brendshëm dhe Drejtësisë RAMON RODRIGUEZ CHACIN, i pandehur. Ky trafikim masiv droge ka përqendruar gjithashtu pushtetin dhe pasurinë në duart e familjes së Maduro Moros, përfshirë gruan e tij, të supozuarën Zonjën e Parë të Venezuelës CILIA ADELA FLORES DE MADURO, e pandehur, dhe djalin e Maduros, anëtarin e Asamblesë Kombëtare të Venezuelës NICOLAS ERNESTO MADURO GUERRA, i njohur edhe si “Nicolasito”. Ky cikël korrupsioni i bazuar në narkotikë mbush xhepat e zyrtarëve venezuelianë dhe familjeve të tyre, ndërkohë që përfiton edhe narko-terroristët e dhunshëm që veprojnë pa u ndëshkuar në tokën venezueliane dhe që ndihmojnë në prodhimin, mbrojtjen dhe transportimin e tonelatave të kokainës në Shtetet e Bashkuara”, thekson aktakuza.
Në aktakuzë thuhet se qëllimi i kësaj skeme ka qenë “përmbytja e Shteteve të Bashkuara me kokainë”, duke përdorur të ardhurat e drogës për pasurim personal, ruajtje të pushtetit dhe mbështetje të organizatave terroriste.
Nëse shpallet fajtor, Maduro mund të përballet me burgim të përjetshëm, konfiskim pasurie dhe sanksione të tjera penale sipas ligjit federal amerikan.
Qeveria e Venezuelës ka hedhur poshtë më herët akuza të ngjashme, duke i cilësuar ato si politike dhe të motivuara nga presioni ndërkombëtar.
