Fluksi i madh i mërgimtarëve, që kanë mësyrë Kosovën për pushime, por edhe të atyre që po kthehen ka bërë që këtë fundjavë të krijohen kolona dhe pritje më shumë se një orë në disa pika të kalimit kufitar mes Kosovës dhe Serbisë, raporton Gazeta Enigma.
Kjo fundjavë po shënon rritjen e numri të mërgimtarëve kosovarë që po vijnë për pushime nga vendet e Evropës Perëndimore, por edhe të atyre që po kthehen. Sipas Qendrës Kombëtare për Menaxhim Kufitar, në matjen e bërë në orën 15:10, në disa vendkalime kufitare me Serbinë, për të hyrë në Kosovë po pritet më gjatë se 60 minuta, kurse për të dalë deri në 3 orë.
Pritje dhe kolona më të gjata ka në vendkalimin kufitar në Merdar, ku po pritet deri në 100 minuta për të hyrë, kurse deri tri orë për të dalë. Kolona e automjeteve në anën serbe të kufirit është deri në 200 metra, kurse në dalje deri në 400 metra, shkruan Telegrafi.
Ndërsa, në vendkalimin kufitar te Dheu i Bardhë, për të hyrë në Kosovë po pritet deri në 70 minuta, kurse në Jarinje deri në 60 minuta.
Në vendkalimet e tjera kufitare të Kosovës me vendet fqinje, për hyrje dhe dalje nuk pritet më gjatë se 5-10 minuta.
Ndërkohë, një numë i madh bashkatdhetarësh po vazhdojnë të vijnë në Kosovë përmes linjës ajrore.
Agjencia e Shërbimeve të Navigacionit Ajror ka bërë të ditur të premten se në Aeroportin Ndërkombëtar i Prishtinës “Adem Jashari” është realizuar rekord operimesh-aterrimesh me gjithsej 130 sosh./Gazeta Enigma/
