Shërbimi Spitalor dhe Klinik Universitar i Kosovës (ShSKUK) ka njoftuar se kontrasti medicinal IOHEXOL 350 mg/ml, i cili përdoret për qëllime diagnostike në imazheri, është konfirmuar si i sigurt për përdorim dhe masa e pezullimit të tij është hequr
Ky produkt ishte pezulluar për dy muaj pas paraqitjes së reaksioneve alergjike tek disa pacientë.
Në njoftimin e SHSKUK-së thuhet: “Shërbimi Spitalor dhe Klinik Universitar i Kosovës (ShSKUK), njofton opinionin publik se produkti medicinal IOHEXOL 350 mg/ml (kontrast jo-jonik), i cili përdoret për qëllime diagnostike në imazheri, është konfirmuar si i sigurtë për përdorim dhe i është hequr masa e pezullimit.”
Vendimi është marrë pas analizave të përfunduara nga një laborator i akredituar jashtë vendit dhe raportit të dërguar nga Departamenti i Farmakovigjilencës në Agjencinë Kosovare për Produkte dhe Pajisje Medicinale (AKPPM).
Po ashtu, Inspektoriati Farmaceutik ka konfirmuar se produkti plotëson të gjitha standardet e sigurisë dhe cilësisë për përdorim mjekësor, duke siguruar që pacientët mund ta përdorin atë pa frikë.
