Analisti Albert Krasniqi ka komentuar ftesën për mbledhje të Kryesisë së Kuvendit, ani pse nuk është plotësuar lista e nënkryetarëve të Kuvendit.
Krasniqi ka thënë se Dimal Basha nuk gëzon asnjë kompetencë për të ushtruar funksionet e plota derisa të përfundojë seanca konstituive.
“Zgjedhja e Kryetarit dhe e pesë nënkryetarëve të Kuvendit është e paraparë në të njëjtin nen të Kushtetutës (neni 67.1). Këto dy akte nuk mund të ndahen mes vete, pasi vetëm me zgjedhjen e Kryetarit dhe të pesë nënkryetarëve Kuvendi konsiderohet i konstituar”, ka sqarua Krasniqi.
Sipas tij, kryetari i sapozgjedhur i Kuvendit nuk gëzon asnjë kompetencë të plotë për të ushtruar funksionet e tij derisa të përfundojë seanca konstituive. Deri në atë moment, roli i tij është thjesht teknik: të drejtojë seancën konstituive, e jo të ushtrojë funksione të tjera. Madje, rregullorja e mëhershme e Kuvendit as nuk e njihte mundësinë që kryetari i zgjedhur të merrte drejtimin e seancës pa qenë të zgjedhur edhe nënkryetarët; në atë kohë, seanca konstituive udhëhiqej deri në fund nga deputeti më i vjetër në moshë.
“Në këtë kuptim, thirrja e mbledhjes së Kryesisë së Kuvendit pa qenë të zgjedhur të gjithë pesë nënkryetarët dhe pa qenë Kuvendi i konstituar, është e jashtëligjshme. Çdo vendim i tillë është i cenuar në legjitimitet dhe asnjë prej tre nënkryetarëve të zgjedhur në mënyrë ligjore nuk duhet të marrin pjesë në këtë mbledhje”, ka thënë analisti Krasniqi.
“Procesi i konstituimit të Kuvendit duhet të rikthehet aty ku ka mbetur: tek zgjedhja e dy nënkryetarëve nga radhët e komuniteteve joshumicë. Vetëm pas përmbylljes së këtij hapi, Kuvendi mund të konsiderohet i konstituar dhe Kryesia e tij e ligjshme për të ushtruar funksionet e parashikuara me Kushtetutë dhe Rregullore”, ka theksuar ai.
