Kryetari i Partisë Demokratike të Kosovës, Memli Krasniqi nuk ka një shpjegim të qartë se pse partia e tij nuk ka shënuar sukses me votat e diasporës, në zgjedhjet e 9 shkurtit.
Ai në Rubikon të Klan Kosovës, ka deklaruar se asnjëra nga partitë politike në Kosovë nuk ka pasur aktivitet më të madh në diasporë sesa PDK-ja. Pikërisht për këtë thotë se rezultati i tyre atje nuk përputhet.
“S`kam shpjegim për rezultatin e PDK-së në diasporë. Nuk është absolutisht racionale, ju siguroj dhe besoj që mund me dëshmu se asnjë parti, bashke me i mbledhë tjerat dhe PDK-në ndamas, nuk kanë pas aktivitet në diasporë në 3-4 vitet e fundit më shumë se na. Kjo është e evidentume në krejt format e mundshme, unë ju siguroj vetëm takimet në muajin nëntor ku ka qenë Bedri Hamza si kandidat për kryeministër, që kanë qenë katër në Gjermani, një në Itali, një në Austri dhe një në Zvicër. Në ato takime kanë qenë prezent rreth 7 mijë vetë. Takim më të madh në Gjermani nuk është mbajtë najherë, as para as pas luftës në sallë, po flas për takimin që është mbajtë në Shtutgart”, tha Krasniqi.
Ai thotë se ka dyshime por jo dëshmi se çka ka ndodhur me votat e diasporës, por pret që këtë çështje ta sqarojë prokuroria.
“Unë nuk muj sot në asnjë mënyrë racionale me shpjegu se qysh është e mundshme që PDK me i marrë vetëm 6 mijë vota plus me postë edhe 1 mijë nëpër ambasada. As unë as kolegët e mijë që janë marrë me vite në riorganizimin e PDK-së, as kandidatët tonë nuk munden me shpjegu. Na i kemi pas në 2021 kohën ma të vështirë edhe me rezultatin më të dobët, 5 mijë vota në diasporë pa e pas një degë, asnjë nëndegë aktive, asnjë kandidat të diasporës në një proces të parakohshëm zgjedhor. Në këto zgjedhje i kemi 7 mijë vota, kur e krahasojmë me atë që vitit 2021, ne mbesim aty-aty. Nuk muj me shpjegu kërqyshë krejt këtë angazhim pse s`ka prodhu rezultat. Po e them vetëm një gjë për herë të parë, meqë u ba temë e madhe votat e diasporës, shpresoj e besoj që Prokuroria e Kosovës me na jep përgjigje. Unë nuk kam dëshmi, muj me pas dyshime, po dëshmi reale nuk kam ishalla e gjenë prokuroria përndryshe për mua është me rëndësi me ditë të vërtetën”, tha Krasniqi.
