Kryetari i PDK-së, Memli Krasniqi, ka vizituar ish-komandantët e UÇK-së, Hashim Thaçin dhe Kadri Veselin, që po gjykohen në Gjykatën Speciale të Kosovës në Hagë.
Ai tha se kjo vizitë e tij është e para pas gjashtë muajsh, teksa theksoi se dyshja ishin me moral të lartë dhe besimplotë në të drejtën e tyre, të Kosovës dhe të luftës së shenjtë për liri.
“Pas gati gjashtë muajsh, sot vizitova përsëri Presidentin Thaçi dhe Kryetarin Veseli në Hagë. I gjeta ashtu siç i kisha lënë herën e fundit: me moral të lartë dhe besimplotë në të drejtën e tyre, në të drejtën e Kosovës dhe në të drejtën e luftës së shenjtë të popullit tonë për liri. Të gjithë bashkëndjejnë dhe jetojnë çdo ditë me fatin e Kosovës dhe qytetarëve tanë. Ndonëse liria fizike e tyre është e kufizuar, shpirti i tyre mbetet i pathyer”, shkroi Krasniqi në Facebook.
Fjalët, qëndrimi dhe kurajo e tyre, tha Krasniqi më tej, “më bindin në secilën vizitë se të tillë do të mbeten deri në ditën e madhe të rikthimit në atdhe”.
Ndërkaq, kryetari i PDK-së tha se qëndrimi i tyre në paraburgim është i padrejtë.
“Megjithatë, qëndrimi i tyre i padrejtë në këtë vend, vazhdon të na rikujtojë sakrificat dhe çmimin e lartë të lirisë – që populli ynë vazhdon të paguajë edhe pas 25 vitesh”.
“Keni të fala të gjithë, pa përjashtim, nga çlirimtarët tanë. Pa dyshim, dielli do të lind përsëri”, përfundoi Krasniqi.
