Kryetari i Nismës Socialdemokrate, Fatmir Limaj ka thënë se kryeministri aktual, Albin Kurti nuk mund ta ndryshojë historinë.
Ai ka thënë se çliruesit e Kosovës janë Hashim Thaci, Jakup Krasniqi, Kadri Veseli, Rexhep Selimi, Nasim Haradinaj, Hysni Gucati dhe ushtarët e UÇK-së.
Duke folur në Pressing të T7, Limaj ka thënë se disa mund të kenë komplekse për shkak se nuk kanë vepruar kur ka qenë kohë, duke aluduar në kohën e luftës së UÇK-së me Serbinë.
“Nuk mundet me ndryshu historinë Albin Kurti, as ti, as unë, askush. Çliruesit e Kosovës janë Hashim Thaci, Jakup Krasniqi, Kadri Veseli, Rexhep Selimi, Nasim Haradinaj, Hysni Gucati, Pjetri…. edhe ushtarët e UÇK-së. E kuptoj që e kanë kompleksin që kur ka qenë koha s’kanë bërë kurrgjë”, ka deklaruar Limaj.
“Ata njerëz janë që i kanë pri çlirimit të shtetit dhe shtet-ndërtimit”, ka shtuar ai.
Sipas Limajt, koha e provimit të luftës me Serbi ka kaluar dhe tani është koha e mençurisë dhe urtësisë politike.
“Koha për ta provuar a lëshojmë pe, apo jo, me Serbinë, mendoj që ka qenë në luftë. Ka qenë test. Nëse në atë kohë kam qenë i gatshëm ta sakrifikoj veten, familjen, babën, nanën e fëmijët… atëherë ka qenë provimi. Nuk është më ajo kohë. Tash është koha kush është më i mecëm, kush është më i urtë politikisht”, ka thënë Limaj.
Sa i përket videos së VV-së, ku mes tjerëve edhe Limaj etiketohet si “shkatërrues shteti”, ai ka pyetur se çfarë ka pasur në vitin 1999 për t’u shkatërruar më pas.
“Çka pasur në të ’99-ën në Kosovë që e kemi shkatërruar ne? Sollëm lirinë, nisi rindërtimi i vendit, prej -1, jo prej zeros”, ka pyetur ai.
