Me ftesë të Këshillit Ekonomik Wirtschaftsrat der CDU, kryeministri Albin Kurti së bashku me ambasadorin e Kosovës në Gjermani, Faruk Ajeti, zhvilluan një drekë punë më përfaqësues të kompanive anëtare dhe përfaqësues politikë të nivelit lokal dhe federal.
Përgjatë bisedës, Kurti, pasi prezantoi mundësitë që Kosova ka në të bërit biznes, ftoi të pranishmit që të vizitojnë vendin tonë për të parë nga afër përparësitë që ka për investimet e huaja.
Sipas njoftimit të Kryeministrisë, Wirtschaftsrat der CDU është shoqatë e bizneseve gjermane që përfaqëson interesin e më shumë se 11 mijë kompanive të vogla dhe të mesme, si dhe kompanive multinacionale.
Gjatë ditës, kryeministri Kurti po ashtu vizitoi Baden-Wurttemberg Stiftung, i cili u themelua në vitin 2000 si Fondacioni Shtetëror me seli në Shtutgart. Asetet janë rreth 2.3 miliardë euro.
Nën moton “Ne dhurojmë të ardhmen”, ajo vë në dispozicion nga 35 deri në 40 milionë euro për programe dhe projekte bamirësie çdo vit, duke e bërë atë një nga fondacionet më të mëdha të së drejtës private në Gjermani.
“Me të pranishmit aty, kryeministri Kurti diskutoi për mundësitë e bashkëpunimit me mërgatën tonë në Baden-Wurttemberg nëpërmjet projekteve në fushën e shkencës dhe edukimit”, u tha në njoftimin e Kryeministrisë.
