Kuvendi i Kosovës, me 79 vota për, ka miratuar Programin Kombëtar për Integrim Evropian 2023-2027.
Ky program përmban një sërë masash për zbatim, përfshirë miratimin edhe të 29 projektligjeve të reja.
Edhe pse deputetët e partive opozitare votuan për këtë program, ata kritikuan ekzekutivin se e ka bllokuar procesin e integrimit evropian të Kosovës.
Zëvendëskryeministri Besnik Bislimi ka thënë se buxheti i tërësishëm për zbatimin e këtij programi është mbi 47 milionë euro.
“Buxheti i tërësishëm për zbatimin e programit arrijnë shifrën e 47 milionë e 129 mijë euro, prej të cilave nga buxheti shtetëror janë siguruar 29 milionë euro, ndërsa pjesa tjetër prej 17 milionë euro nga partnerët zhvillimor. Rrjedhimisht s’ka asnjë vakum buxhetor për zbatimin e këtij programi”, ka thënë ai.
Mirëpo, deputetja e PDK-së, Blerta Deliu-Kodra, është shprehur e habitur se si mund të vazhdohet me miratimin e reformave evropiane, derisa delegacionet e Kosovës nuk po marrin pjesë në takime me BE-në për shkak të masave që janë vendosur ndaj Kosovës.
“Si mund të vazhdohet reforma jonë si shtet në përmbushje të obligimeve që i kemi marrë karshi Bashkimit Evropian, derisa ne sot votojmë dhe në anën tjetër delegacionet e Kosovës nuk marrin pjesë në takime për shkak të sanksioneve të cilat tashmë i kanë vendosur zyrtarët e BE-së”, deklaroi Deliu.
Kritike ndaj ekzekutivit është shprehur edhe deputetja e LDK-së, Rrezarta Krasniqi.
“Të flasim sot për procese të integrimit është kontradiktore dhe mbase e pabesueshme, pasi BE-ja është duke diskutuar dhe vendosur masa kundër Kosovës në procesin e integrimit. Duke qenë se gjendemi në një fazë në të cilën nuk po kërkohet përmbushje e masave legjislative, por ndërmarrje e veprime konkrete për shtensionim të situatës”, tha ajo.
Ndërkaq, deputetja e AAK-së, Time Kadrijaj, është shprehur pesimiste se Kosova do të ketë lajme pozitive për anëtarësim në Këshillin e Evropës, për shkak të situatës në veri.
“Kjo qeveri e ka bllokuar rrugën e vet evropian. Aty ku kemi aplikuar, qoftë për anëtarësim në BE, nuk do të kemi asnjë veprim pozitiv. Por edhe në Këshillin e Evropës besoj se do të bllokohet dhe Kosova nuk do të arrijë të bëhet pjesë e Këshillit të Evropës”, theksoi ajo.
Në këtë seancë, deputetët kanë miratuar në lexim të dytë Projektligjin për ndryshimin dhe plotësimin e ligjeve që përmbajnë procedura të veçanta administrative dhe harmonizimin e tyre me Ligjin për procedurën e përgjithshme administrative.
Po ashtu, është miratuar në lexim të dytë edhe Projektligjin për Kinematografinë.
