Lidhja Demokratike e Kosovës (LDK), ditë më parë mbajti mbledhjen e Kryesisë, ku u morr vendimi që një nga figurat kyqe për disa vite të kësaj partie, ish nënkryetari Agim Veliu, të shkarkohet.
Kreu aktual i LDK-së, Lumir Abdixhiku kishte thënë se kryetari i deritanishëm i degës në Podujevë, Agim Veliu nuk ka shprehur interesim për të rikandiduar.
E këto deklarata i kishte kundërshtuar vetë Agim Veliu, i cili kishte deklaruar se është kundër këtij vendimi dhe se marrëveshja është bërë pa pëlqimin e tij.
Telegrafi ka siguruar vendimin e Kryesisë së LDK-së, për shkarkimin e Veliut.
Në pikën e pestë të këtij vendimi i cili përmban gabime të shumta drejtshkrimore, thuhet se “Si pjesë riorganizimit të brendshëm, të prezantuar në Platformën e Kryetarit të LDK-së 2021-2023, të miratuar në Këshill të Përgjithshëm merren këta hapa organizativ:
a) të gjitha kompetencat e udhëheqjes së degës së LDK-së në Podujevë, i kalojnë kandidatit të LDK-së. Kandidati udhëheqë me Kryesinë e degës, zyrën e degës dhe bashkërendon aktivitetet me kryetarët e nëndegëve në Komunën e Podujevës;
b) Pas procesit zgjedhor, Kryesia do të nxjerrë një vendim të ri në lidhje me organizimin e degës, në përputhje me Platformën e kryetarit të LDK-së dhe procedurat e parapara statutore”
Lidhur me shkarkimin e Agim Veliut, anëtari i Kryesisë së LDK-së, Xhafer Tahiri mohoi një gjë të tillë.
Ndryshe LDK ka marrë vendim që Ekrem Hyseni të jetë kandidat i saj për kryetar të Podujevës në zgjedhjet lokale që pritet të mbahen në vjeshtë të këtij viti.
