Një aksident me fatalitet ka ndodhur sot pasdite në Prizren, ku një këmbësor është goditur nga një veturë dhe ka ndërruar jetë.
Sipas informacionit të parë, viktima është një mashkull rreth 80 vjeçar, ndërsa lajmin e ka konfirmuar zëdhënësi rajonal i Policisë – Prizren, Shaqir Bytyqi.
I dyshuari në këtë rast është një zyrtar policor nga Prizreni, i cili në momentin e aksidentit ishte jashtë detyrës zyrtare dhe lëvizte me veturë private.
Burimet e Sinjalit bëjnë të ditur se bëhet fjalë për zyrtarin policor Isë Gashin.
“I dyshuari aktualisht ndodhet në Stacionin Policor të Prizrenit. Për veprimet e mëtejshme administrative dhe penale do të koordinohemi me Inspektoratin Policor të Kosovës (IPK) dhe Prokurorin Kujdestar, për çka do të njoftoheni me kohë. Lidhur me rastin janë njoftuar Prokurori i Shtetit dhe Inspektorati Policor i Kosovës, të cilët janë duke u marrë me procedurat e nevojshme hetimore.”, tha Bytyqi.
