Libër i rëndësishëm për organizimin dhe funksionimin e qeverisjes lokale

Shkruan Prof. dr. Sadik Haxhiu

Puna hulumtuese e bërë nga autori i këtij libri që nga periudha e pasluftës e deri më sot tregon se sa i rëndë­sishëm është bashkëpunimi ndërkomunal për komu­nën dhe qytetarët e saj.

Duke përdorur metoda bashkëkohore të hulumtimit, autori ka bërë një hulumtim të thuktë, konciz, preciz për rolin e bashkëpunimit ndërkomunal në Republikën e Kosovës dhe bashkëpunimin me komunat jashtë Republikës së Kosovës.

Në këtë libër është paraqitur në mënyrë kronologjike bashkëpunimi ndërkomunal që nga paslufta e më tutje; si është i rregulluar ky bashkëpunim me ligje dhe akte të tjera juridike dhe sa kanë hapësirë komunat ta bëjnë një gjë të tillë. Përveç Kosovës, në aspektin krahasues janë paraqitur shembuj konkretë të organizimit dhe bashkëpunimit ndërkomunal në disa shtete të Evropës si dhe në Shtete të Bashkuara të Amerikës.

Autori ka bërë hulumtim praktik në terren duke për­dorur metodën e anketës, përmes së cilës ka realizuar një pasqyrim të qartë se sa qytetarët janë të informuar për bashkëpunimet ndërkomunale si dhe sa janë të rëndë­sishme këto bashkëpunime për komunitetin.

Kryetarët e komunave janë raste konkrete që tregojnë se sa u japin rëndësi bashkëpunimeve ndërkomunale në Republikën e Kosovës si dhe me komunat jashtë shte­tit, duke krahasuar dhe konstatuar se sa janë të rëndë­sishme këto bashkëpunime për qytetarët e tyre.

Përmes këtij hulumtimi autori ka arritur të paraqesë se si është e organizuar qeverisja e pushtetit lokal në Republikën e Kosovës; si organizohet dhe funksionon pushteti lokal; si ka rrugëtuar reforma e administratës publike në Kosovë nga viti 1999/2000 e deri më tani; cilat janë kompetencat dhe autorizimet e pushtetit lokal; si mund të realizohen bashkëpunimet ndër­komunale; cilat hapa duhet të ndërmerren për përmi­rësimin e jetës së qytetarëve;  cili është dallimi i reali­zimit të bashkëpunimeve ndërkomunale në mes të Republikës së Kosovës dhe vendeve të tjera të Evropës dhe ShBA-së.

Autori i këtij libri ka paraqitur përvojat e kryetarëve të komunave në Republikën e Kosovës të cilët  tregojnë për përvojat e tyre me bashkëpunimet ndërkomunale, si dhe sa janë të rëndësishme ato bashkëpunime dhe si realizohen.

Ky libër do të jetë një shembull i mirë për të gjitha atë që studiojnë organizimin dhe funksionimin e  qeveri­sjes lokale, të administratës së pushtetit lokal, për t’u mirinformuar se si funksionojnë bashkëpunimet ndër­komunale si dhe cilat janë hapat që duhet të ndërme­rren për t’u realizuar një bashkëpunim i tillë.