Në kampusin universitar “Hasan Prishtina”, është dëmtuar mbishkrimi ndriçues simbolik “LIRIA KA EMËR”.
Në lidhje me këtë ka reaguar platforma “LIRIA KA EMËR” duke thënë se e dënojmë ashpër këtë akt vandalizimi.
Në reagimin e tyre thuhet se ky obelisk është shënjuesi që përkujton e nderon sakrificën e dëshmorëve dhe siç thuhet në shkrim, rrugën e popullit tonë drejt lirisë.
“Platforma LIRIA KA EMËR shpreh shqetësimin dhe dënon ashpër aktin e vandalizmit ndaj obeliskut “Liria ka emër” pranë Bibliotekës Kombëtare brenda kampusit të Universitetit të Prishtinës. Ky obelisk është shenjuesi që përkujton e nderon sakrificën e dëshmorëve dhe rrugën e popullit tonë drejt lirisë”.
“Andaj ky veprim është një fyerje e rëndë ndaj kujtesës sonë historike kolektive dhe përpjekjeve të brezave që kanë dhënë gjithçka për dinjitetin, lirinë dhe të ardhmen e vendit. U bëjmë thirrje organeve kompetente që të ndërmarrin veprimet e menjëhershme për identifikimin dhe ndjekjen penale të autorëve të këtij akti të papranueshëm. Veprime të tilla nuk guxojnë të mbeten pa përgjegjësi”, thuhet tutje në reagim.
