Kryetari i Komunës së Drenasit, Ramiz Lladrovci, këtë të enjte ka shkarkuar nga puna dy drejtorë komunalë me qëllim të ngritjes së performancës dhe efikasitetit në kabinetin e tij.
Të shkarkuarit janë drejtori për Gjeodezi, Kadastër dhe Pronë, Ruzhdi Lestrani dhe drejtoresha për Zhvillim Ekonomik, Egzona Jetullahu-Gjoshi.
“Më qëllim të ngritjes se performancës dhe efikasitetit të Kabinetit tim, kam marrë vendim për lirim nga detyra e dy drejtorëve të drejtorive, z. Ruzhdi Lestrani dhe znj. Egzona Jetullahu-Gjoshi. I falënderova për bashkëpunimin dhe urova suksese në punën e tyre të mëtejme. Ky vendim nuk ishte i lehtë, sepse, me vite kemi punuar e bashkëpunuar për të qenë komuna më e mirë në performancën komunale”, thuhet në njoftimin e Komunës së Drenasit.
Po ashtu thuhet se së shpejti do të bëhet edhe emërimi i drejtorëve të rinj.
