Të paktën 116 të vdekur dhe dhjetëra të tjerë të plagosur është bilanci i një përplasjeje të ashpër mes grupeve rivale në burgun e Guajakilit në Ekuador, një ndër ngjarjet më të rënda të regjistruara ndonjëherë në burgjet e vendit.
Konsiderohet e tillë pasi mes të vdekurve ka edhe 5 të burgosur, të cilëve sipas autoriteteve u është prerë koka nga rivalët.
Autoritetet thanë se të burgosurit kishin edhe armë, ndërsa kanë hedhur edhe granata ndaj njëri-tjetrit. Presidenti Gilermo Lasso shpalli gjendjen e emergjencës në sistemin e burgjeve, ku veç gardianëve, për të shuar trazirat në burgun e Guajakilit është angazhuar edhe ushtria.
Nxitës të dhunës janë grupet meksikane, ndër të cilat edhe karteli i famshëm i Sinaloas.
Autoritetet thonë se ata kërkojnë nga bashkëpunëtorët e tyre ekuadorianë të marrin kontrollin e rrugëve të trafikimit të kokainës dhe lëndëve të tjera narkotike që prodhohen në Ekuador, ku jo rrallë herë ka rënë në sy edhe përfshirja e trafikantëve shqiptarë.
Beteja është shtrirë edhe në burgje për të vrarë krerët e grupeve rivale. Për trazirat, kartelet e mëdha shfrytëzojnë edhe mbipopullimin e burgjeve ekuadoriane, që kanë kapërcyer me 30% kapacitetet meksikane.
