Liderë nga më shumë se 30 vende u mblodhën të enjten në Paris për të diskutuar mënyrat e forcimit të pozicionit të Ukrainës, si brenda ashtu edhe jashtë fushëbetejës. Ata premtuan ndihmë të re për Kievin dhe shqyrtuan propozimet për vendosjen e forcave evropiane në Ukrainë, në rast të arritjes së ndonjë marrëveshjeje për paqe.
Pas samitit të quajtur “Koalicioni i Vullnetit” – i cili nuk përfshinte Shtetet e Bashkuara – presidenti francez Emmanuel Macron deklaroi se liderët e mbledhur në Paris janë më të bashkuar se kurrë rreth Ukrainës dhe se duhet të sigurohen që të kundërshtojnë përpjekjet e Rusisë për të zvarritur bisedimet e paqes me qëllim të fitimit të më shumë territoreve.
“Qëllimi ynë është i qartë”, tha Macron në një konferencë për shtyp pas samitit.
“Synimi është të arrijmë paqen dhe, për ta bërë këtë, duhet ta vendosim Ukrainën në pozicionin më të mirë të mundshëm”, theksoi ai.
Presidenti francez njoftoi se ministrat e jashtëm të vendeve anëtare të koalicionit do të shqyrtojnë çështjet ligjore mbi mundësinë e vendosjes së një force sigurie të udhëhequr nga Evropa për të mbështetur një armëpushim dhe do të raportojnë rezultatet brenda tri javësh.
“Do të ketë një forcë sigurie që do të veprojë në Ukrainë, përfaqësuar nga disa vende”, tha Macron.
“Nuk është Rusia ajo që mund të vendosë nëse një forcë sigurie mund të vendoset në Ukrainë”, shtoi ai me vendosmëri.
Macron pranoi se aktualisht nuk ka një konsensus të plotë për dërgimin e një force evropiane në Ukrainë dhe se jo të gjithë anëtarët janë dakord për të marrë pjesë. Megjithatë, ai theksoi se njëzëshmëria nuk është e domosdoshme për të ecur përpara me këtë iniciativë.
