Ish-luftëtarin e UÇK-së, Salih Musaftën, i cili ndodhet në paraburgim në Hagë, e vizitoi mbesa e tij, Arta Mustafa.
Përmes një reagimi në Facebook, Arta shkruan fjalë të përzemërta e plot mall për xhaxhanë e saj.
Ajo shprehet e bindur se liria vjen, e drejtësia do të triumfojë.
Reagimi i plotë i Arta Mustafës për vizitën në Hagë te xhaxhai i saj, Salih Mustafa:
Xhaxhi, sa më kishte marr malli!
Dje e takova për herë të parë, pas pothuajse pesë vitesh, axhën tim – Salih Mustafën. U përqafuam pas kaq shumë kohe mungesë, vuajtje, padrejtësi.
Nuk ka fjalë që përshkruajnë ndjesinë e atij momenti. Ishte mall, dhimbje dhe krenari – të gjitha në një.
Të shohësh dikë që e do, e që për ty është simbol i qëndresës dhe drejtësisë, të mbyllur padrejtësisht kaq gjatë, dhe prapë ta gjesh të fortë, të kthjellët, të qëndrueshëm – është emocion që s’harrohet kurrë.
Xhaxhi im nuk është thyer.
As koha, as largësia, as izolimi nuk ia kanë zbehur dritën në sy. E mban qëndrimin me dinjitet, ashtu siç e ka mbajtur gjithmonë – me bindjen se e vërteta do të dalë në dritë.
Dje u përqafuam, jo vetëm si mbesë e axhë, por si dy gjenerata që nuk e harrojnë asnjëherë sakrificën për liri.
LIRIA DO TË VIJË. E do ta presim bashkë, krahë për krahë.
p.s – Duhemi me rifresku foton, xhaxh!
