Mbreti Charles i ka dërguar një letër mbështetjeje ish-presidentit amerikan Joe Biden, pasi ky i fundit është diagnostikuar me një formë agresive të kancerit të prostatës, ka njoftuar Buckingham Palace.
Charles, i cili aktualisht po trajtohet edhe vetë për kancer, ka pasur një takim me Bidenin në korrik të vitit 2023 në Windsor, ku kishin ndarë çaj dhe bisedë miqësore.
Përveç Mbretit, edhe shumë politikanë e figura të njohura botërore kanë shprehur solidaritet me Bidenin, duke i dërguar mesazhe urimi për shërim. 82-vjeçari, i cili është presidenti më i vjetër në historinë e Shteteve të Bashkuara, është përshkruar nga mbështetësit si një “luftëtar”.
Në një reagim publik të bërë sot në platformën “X”, Biden ka falënderuar të gjithë për mesazhet mbështetëse, duke shprehur mirënjohje për përkrahjen që ka marrë në këto ditë të vështira.
