Partia Socialiste dhe Partia Demokratike, me akuza të rënda kanë mbyllur fushatën elektorale për zgjedhjet e 25 prillit.
Kryeministri i Shqipërisë, Edi Rama, rivalët e tij i ka quajtur “fantazma e turp të kombit”.
Rama mbylli seancën e tij në Vlorë, duke premtuar 12-fish më shumë punë.
“Do të bëj 12 herë më shumë për Vlorën se që kemi bërë në këto dy mandate që po mbyllen. Kur them Vlora, them jo vetëm Bashkia e Vlorës…. kur them Vlora them Shqipëria”, ka thënë ai.
Ndërkaq, PD-ja ka mbyllur fushatën në Tiranë, me kreun e saj, Lulzim Basha, që ka thënë se PD-ja do t’ua rikthejë Shqipërinë shqiptarëve.
Basha ka thënë se në këto zgjedhje PD-ja do të marrë fitoren më të thellë në 30 vjet.
“Dita e diel është dita e çlirimit për të gjithë ju, për të gjithë rrogëtarët e dhunuar nga shteti, që trajtohen si skllevër për të mbushur xhepat e tyre. Ejani dhe ju bëhuni pjesë e bashkimit; mësues, mjekë, punonjës të ndershëm të policisë së shtetit që më keni thënë me fjalë, me sy, me gjeste: ‘na ka ardhur në majë të hundës’, të dielën largoheni me votë të keqen”, ka deklaruar kreu i PD-së, Basha, raporton “Euronews Albania”.
