Qendra Përkujtimore e Srebrenicës informon publikun se, në përputhje me situatën aktuale të sigurisë, do të jetë e mbyllur deri në njoftimin e dytë.
“Siguria duhet të jetë e para dhe qendra do të qëndrojë e mbyllur deri në stabilizimin e situatës dhe sigurimin e garancive adekuate”, thuhet në njoftim.
Bëhet e ditur se të gjithë punonjësit e Qendrës Memoriale do t’i kryejnë detyrat e tyre duke punuar nga shtëpia, nëse është e mundur, për të ruajtur vazhdimësinë e operacioneve administrative dhe të tjera, përcjell Telegrafi.
Ky organizim i punës do të jetë i përkohshëm deri në plotësimin e kushteve për kthim në aktivitetet e rregullta.
“Ne shprehim mirënjohjen tonë për të gjithë vizitorët për mirëkuptimin dhe durimin gjatë kësaj periudhe. Misioni ynë mbetet i pandryshuar për të ruajtur kujtimin e viktimave të gjenocidit dhe edukimin për rëndësinë e paqes, tolerancës dhe të drejtave të njeriut”, thuhet në njoftim.
