Më shumë se 2000 njerëz janë liruar nga spitalet në Stamboll të Turqisë pas trajtimit për lëndimet e pësuara në tërmetin e fuqishëm të së hënës, raportoi të dielën transmetuesi shtetëror turk “TRT Haber”, transmetoi CNN-i.
Mijëra të plagosur nga 10 provincat e goditura nga tërmeti në Turqinë jugore janë sjellë në Stamboll me avionë ushtarakë të Forcave të Armatosura Turke dhe avionë të ambulancës nga Ministria e Shëndetësisë.
Sipas “TRT Haber”, 2,193 nga 3,405 personat e sjellë në qytet janë liruar, ndërsa trajtimi vazhdon për 1,212 të mbetur.
Në Stamboll, autoritetet kanë transferuar të plagosurit në spitalet publike, private dhe universitare në qytet.
