Më shumë se 200 të burgosur janë arratisur nga burgu i Malir në Karaçi, Pakistan, pas një tërmeti të fuqishëm që goditi qytetin më të madh të Pakistanit në orët e para të së martës.
Sipas njoftimeve të policisë, mijëra të burgosur shfrytëzuan rastin për të thyer dyert dhe bravat e qelive të tyre, si dhe dritaret, pasi ndienë dridhje të forta që lëkundën muret e burgut.
Pavarësisht kaosit të krijuar, policia bëri të ditur se 80 të burgosur janë rikapur deri tani, ndërsa kërkimet për më shumë se 130 të arratisur vazhdojnë. Gjatë operacionit për rikthimin e të arratisurve, një i burgosur humbi jetën dhe dy oficerë burgu u plagosën.
Drejtori i burgut tregoi për BBC-në se të burgosurit filluan të bërtisnin nga qelitë dhe kazermat e tyre, pasi ishin të frikësuar se ndërtesa mund të shembej. Si pasojë, autoritetet reaguan me të shtëna paralajmëruese, duke qëlluar në ajër.
Ndërsa disa të burgosur u kthyen në qelitë e tyre, 216 të tjerë e shfrytëzuan mundësinë për të arratisur plotësisht nga burgu.
Burgu i Malir, i cili është i dytë më i madh në provincën Sindh, është aktualisht mbi kapacitet, me më shumë se 5,000 të burgosur, ndonëse mund të akomodojë deri në 2,200. Ministri për burgjet në provincë, Ali Hassan Zardari, ka urdhëruar një hetim dhe ka paralajmëruar se çdo oficer që ka dështuar do të ndëshkohet.
Familjet e të burgosurve kanë protestuar jashtë portave të burgut, duke kërkuar informacion për të afërmit e tyre, pasi vizitat janë shtyrë pas ngjarjes.
