Kryetari i PDK-së, Memli Krasniqi, ka vazhduar fushatën e Fakteve Interesante për Pavarësinë, duke prezantuar tek ndjekësit e tij kreatorin e Flamurit të Kosovës, Muhamer Ibrahimin – Trimin.
Në një video të shpërndarë në Facebook, Krasniqi tregon se Ibrahimi po ashtu ka qenë ushtar i UÇK-së.
“A e dini që Trimi ka qenë edhe ushtar i Ushtrisë Çlirimtare të Kosovës? Trimi ka shërbyer në Njësinë TF-0 në Zonën e Pashtrikut. Simbolikë e jashtëzakonshme apo jo? Trim, ky po që është fat i madh dhe nder i dyfishtë, edhe me qenë ushtar i lirisë, edhe me dizajnu flamurin e shtetit tënd”, i thotë Krasniqi, Trimit, në video.
Më pas në videoklip flet kreatori i flamurit, i cili thotë se të qenit ushtar dhe kreator i flamurit, janë dy momentet më krenare të jetës së tij.
“Patjetër kryetar, ndoshta as në ëndrrat ma të mira të mia e as në imagjinatën më të mirë timen. Këto dy momente pa dyshim që shënojnë periudhën më krenare të jetës time!”, thotë Trimi.
