Zyra për Çështje të Kategorive të Dala nga Lufta e Ushtrisë Çlirimtare të Kosovës (UÇK) ka bërë të ditur se kanë evidentuar raste të cilat nuk përputhen me të dhënat në mes të certifikatës së statusit dhe listës elektronike që posedojnë në zyrë, e për të cilat nuk mund të lëshohen vërtetime.
“Zyra për Çështje të Kategorive të Dala nga Lufta e UÇK-së, ju informon se ka evidentuar raste të mospërputhjes së të dhënave në mes të certifikatës së statusit dhe listat elektronike që posedojmë në zyrë, për të cilat nuk mund të lëshojë vërtetime”, thuhet në komunikatën për medie nga zyra e kryeministrit.
Tutje ata kanë sqaruar se nuk mund të lëshojnë kopje të certifikatave, kjo për shkak të mungesës së dosjeve fizike të cilat janë të sekuestruara në 2017-tën.
“Po ashtu, në mungesë të dosjeve fizike të cilat janë të sekuestruara në vitin 2017 nga Prokuroria Speciale, nuk kemi mundësi të lëshojmë kopje të certifikatave”.
Ndërsa sqarohet, “se në koordinim me zyrën ligjore të Kryeministrit dhe zyrën e Avokatit të Shtetit, ju kemi drejtuar Kryeprokurorit të Prokurorisë Themelore me propozim për takim të përbashkët, ku do të diskutohet mundësia e rritjes së bashkëpunimit ndërinstitucional dhe të diskutohet për këto paqartësi teknike”.
“Në kuadër të Zyrës së Kryeministrit, që derivon nga Ligji nr.04/L-054 për Statusin dhe të Drejtat e Dëshmorëve, Invalidëve, Veteranëve, Pjesëtarëve të Ushtrisë Çlirimtare të Kosovës, Viktimave Civile dhe Familjeve të tyre, ligjit përkatës për veteranët e UÇK-së dhe legjislacioni tjetër në fuqi”.
Po ashtu, bëhet e ditur se janë në pritje të konfirmimit të propozimit për takim mes kryeministrit dhe zyrës për çështje të kategorive të dala nga lufta e Ushtrisë Çlirimtare e Kosovës.
“Për çdo zhvillim të ri në këtë drejtim do të ju mbajmë të informuar me kohë”, thuhet më tej në komunikatë”. /Gazeta Enigma/.
