Politikani Ragmi Mustafi nga Lugina e Preshevës ka thënë se e ka fshirë grafitin ku shkruhej emri i kriminelit Ratko Mladiqi në qendër të Bujanocit, raporton Gazeta “Enigma”.
Mustafi përmes një postimi në profilin e tij në Facebook ka theksuar se nuk mund të qëndronte i heshtur, ani pse institucionet heshtën.
“Nuk munda ta shikoj i heshtur. Në qendër të Bujanocit, aty ku kalojnë fëmijët tanë, ishte shkruar me të kuqe emri i kriminelit luftës që urdhëroi masakrën e Srebrenicës- ” РАТКО МЛАДИЋ” me simbolet nacionaliste me katër ‘C”’.
“Institucionet heshtën. Policia heshti. Edhe ata që flasin për “multietnicitet” – heshtën. Unë nuk munda. Shkova bashkë me djalin tim Lisarin dhe e fshiva publikisht. Jo për vete. Për fëmijët e këtij qyteti. Për ata që u vranë. Për ata që ende kanë nevojë për drejtësi. Për ata që nuk guxojnë më të flasin, por që nuk janë pajtuar kurrë. Fshim një emër. Por edhe një turp”, ka shkruar ai. /Gazeta Enigma/
