Në objektin e Qeverisë së Kosovës dje janë vendosur emrat e 23 pjesëtarëve të Policisë së Kosovës të rënë në kryerje të detyrës.
Ministri i Punëve të Brendshme, Xhelal Sveçla ka publikuar pamjet në rrjetin social Facebook, teksa ka thënë se Republika e Kosovës është gjithmonë krenar me Policët e rënë në krye të detyrës.
“Në kujtim dhe nderim të sakrificës së 23 pjesëtarëve të Policisë së Kosovës të rënë në kryerje të detyrës, objekti i Qeverisë së Kosovës mbrëmë është ndriçuar me emrat e tyre. Republika e Kosovës është gjithmonë krenare me ju”, ka shkruar ai.
Postimin e tij më pas e ka shpërndarë edhe kryeministri Albin Kurti, i cili ka thënë se 23 policëve të rëndë në detyrë u takon lavdia e përjetshme.
“Në shënim të Ditës Memoriale të Policëve të Rënë në Kryerje të Detyrës, mbrëmë ndërtesa e Qeverisë u ndriçua me emrat e 23 heronjve të ditëve tona, që dëshmuan përkushtimin për rend dhe ligj deri në sakrificë. Atyre u takon lavdia e përjetshme, neve shërbimi i përditshëm”, ka shkruar Kurti.
