Të hënën, më 1 shtator, fillon viti i ri shkollor në Kosovë.
Ymer Ymeri, nënkryetari i SBASHK-ut, ka deklaruar se gjithçka është gati për fillimin e vitit të ri shkollor 2025/2026.
Ai tha se mësimdhënësit janë të përgatitur dhe të gatshëm për të pritur nxënësit në bankat shkollore.
Sipas tij, ndonëse shumica e shkollave janë gati, probleme mund të shfaqen në disa objekte që janë ende në proces rinovimi.
“Sa i përket kuadrit arsimor, personeli është i gatshëm dhe ka filluar punën për përgatitjen e vitit shkollor që nga data 18 gusht. Gjatë këtyre dy javëve, sa kanë qenë nëpër shkolla, kanë bërë të gjitha përgatitjet e duhura për fillimin e vitit të ri shkollor.”
“Ndërsa sa i përket aspekteve të tjera teknike, përgatitjeve të shkollave dhe të tjera, mund të themi se pjesa më e madhe e objekteve të shkollave janë të përfunduara. Disa shkolla janë në procedura renovimi dhe ato, sipas gjitha gjasave, nuk do të mund të fillojnë me kohë. Këto do të duhej të nisin punimet më herët; disa punime fillojnë nga ministria e disa nga komunat,” theksoi Ymeri.
Ai shtoi se shqetësimi më i madh i SBASHK-ut mbetet furnizimi me libra shkollorë. Ymeri kritikoi metodën aktuale të Ministrisë së Arsimit, që detyron prindërit të blejnë vetë librat për t’u rimbursuar më vonë.
“Mendojmë se telashe do të ketë për librat shkollorë. Edhe këtë vit ministria ka zgjedhur një formë të gabuar për furnizimin me libra. Mendojmë dhe qëndrojmë se librat do të duhej të bliheshin nga ministria dhe të shpërndaheshin nëpër shkolla, që ditën e hënë të gjithë nxënësit të pajisen me libra. Vitin e kaluar deri në fund të shtatorit ka zgjatur procesi derisa nxënësit u pajisën me libra; presim që edhe këtë vit të jetë i njëjti problem,” deklaroi Ymeri.
