Drejtoria e Policisë për hetimin e krimeve ekonomike dhe korrupsionit ka ngritur kallëzim ndaj Riza Alshiqit, zyrtar i lartë për monitorimin e transportit qeveritar në MPB, i cili ishte zbuluar duke e keqpërdorur parkingun e Ministrisë të cilin e shfrytëzonte për biznes.
Policia e Kosovës përmes një njoftimi për media ka bërë të ditur se i njëjti dyshohet se ka kryer veprën penale “Keqpërdorim i pozitës apo autoritetit zyrtar”.
Njoftimi i plotë:
Më 26.05.2023 hetuesit policorë nga Drejtoria për Hetimin e Krimeve Ekonomike dhe Korrupsionit, pas veprimeve hetimore në teren, nën dyshimin e kryerjes së veprës penale‘keqpërdorim i pozitës apo autoritetit zyrtar’, kanë ngritur kallëzim penale në Prokuronin Themelore të Prishtinës, kundër të dyshuarit R.A., (mashkull kosovar, viti i lindjes 1981).
I dyshuari duke përdorur autoritetin zyrtar (zyrtar i lartë për monitorimin e transportit qeveritar në MPB), dyshohet se që nga viti 2020, ka shfrytëzuar parkingun e ministrisë për veturat e kompanisë private ‘… Rent A Car’.
Me të pranuar informatën nga një medium publik, Prokuroria Themelore Prishtinë, ka autorizuar policinë për fillimin e hetimeve ndaj këtij të dyshuari.
Gjatë punës hetimore, policia ka arritur të sigurojë dëshmi se i dyshuari në vazhdimësie ka kryer ketë vepër penale nga viti 2020. Policia ka gjetur e sekuestruar prova për kryerjen e kësaj vepre.
I dyshuari është intervistuar, është iniciuar rasti si më lart dhe me aktvendim nga prokurori kompetent rasti do të vazhdojë në procedurë të rregullt.
