Ballkani mund të përballet me një tjetër largim shumë të rëndësishëm gjatë afatit kalimtar veror.
Pas largimit të dy kapitenëve Edvin Kuc dhe Armend Thaqit si dhe top futbollistit Nazmi Gripshi, suharekasit mund të mbesin edhe pa mbrojtësin e talentuar Gentrit Halili.
Ylli ferizajas ka shkëlqyer në vitin e tij të parë me fanellën e Ballkanit dhe ka zgjuar interesimin e skuadrave evropiane.
Telegrafi mëson se dy klube hungareze janë në negociata me agjentin e lojtarit Haris Fakic.
Bëhet fjalë për dy klube të respektuara në elitën e futbollit hungarez, por që burimet e Telegrafit kanë hezituar t’i publikojnë emrat për shkak të negociatave.
22-vjeçari këtë edicion ka zhvilluar 39 ndeshje në të gjitha garat duke shënuar edhe katër gola e duke asistuar në dy të tjerë.
Dy klubet nga elita e futbollit hungarez janë pajtuar t’i plotësojnë të gjitha kushtet lojtarit, megjithatë tani do të kenë punë me Ballkanin.
Përfaqësuesit e lojtarit dhe familja e tij i kanë bërë me dije klubeve hungareze se duhet bindur Ballkani për ta lënë të lirë Halilin i cili është i gatshëm ta bëj një hap para në karrierën e tij.
Dy javët e ardhshme pritet të jenë vendimtare, pasi në adresë të Ballkanit do të vijnë ofertat zyrtare nga dy klubet hungareze dhe do të fillojnë negociatat zyrtarisht për transferimin e Halilit në elitën e futbollit hungarez.
