Presidentja Vjosa Osmani ka folur lidhur me raportet mes Qeverisë së Kosovës dhe Shteteve të Bashkuara të Amerikës. Osmani tha se ka pasur dallime mes zyrtarëve amerikanë dhe kryeministrit Albin Kurti në raste të caktuara.
Ajo tha se Kosova duhet të koordinohet me aleatët paraprakisht, sidomos për çështje të sigurisë.
“Tani unë nuk dua të sillem këtu kinse se po i injoroj problemet. Natyrisht ka patur dallime natyrisht në qasje, jo në qëllim, por në qasje në raste të caktuara, mes zyrtarëve amerikanë dhe qeverisë së Republikës së Kosovës. Megjithatë si presidente e Republikës vazhdimisht bëj thirrje për shkak të interesit të Kosovës, dhe për këtë shkak duhet të shohim shumë më aftagjatë, dhe jo vetëm për ndonjë fitore të momentit që tema që kanë bëjnë me sigurinë në Kosovë dhe në rajon, meqenëse të gjitha varen edhe nga partnerët tanë të sigurisë, dhe për shkak të kontributit të tyre dhe për shkak se janë pjesë e këtyre aleancave të vlerave, ne duhet t’i dakordojmë, t’i koordinojmë, t’i flasim paraprakisht me partnerët tanë”, ka deklaruar Osmani.
Osmani tha se veprimet që bëhen si befasi ndaj partnerëve, nuk mund t’i ndihmojnë Kosovës në aspektin afatgjatë, shkruan Reporteri.net.
“Unë jam e bindur që veprimet që bëhen si befasi, në raport ndaj partnerëve, pavarësisht qëllimit legjitim dhe përputhjes me kushtetuën, në aspektin aftgjatë nuk mund t’i ndihmojnë Kosovës, përkundrazi vetëm në qoftë se ato koordinohen me partnerët sidomos me aleatët tanë në SHBA”, ka deklaruar Osmani në një intervistë për Zërin e Amerikës.
E pyetur për vizitat e rralla të zyrtarëve të Shtetit në Washington, Osmani tha se është normale që ftesat i shkojnë asaj e jo Kurtit, meqë presidenti udhëheq politikën e jashtme.
“Në Kushtetuën e Republikës së Kosovës institucioni i presidentit udhëheq politikën e jatshme. Pra është gjëja më normale që ftesat për në Uashington, për në Nju Jork, për në samitin e ‘Europian Political Community’, ku unë do të udhëtoj pas pak ditësh, në samitin EU Western Balkans, në samitin e Paqes për Ukrainën, ku isha, të jenë për presidenten sepse ky është zbatim i kushtetutës së Republikës së Kosovës. Dhe kështu ka qenë gjithnjë edhe me presidetët paraardhës, të cilët e kanë përfaqësuar Republikën e Kosovës në aspektin ndërkombëtar.
Në asnjë mënyrë unë nuk do të thoja që po injorohet Kosova, në fakt nuk ka asnjë shtet të rajonit që është më prezent sesa Kosova, qoftë në Uashington qoftë në samite të tjera dhe kudo që na jepet mundësia jemi shteti më aktiv me punët tona, natyrisht me raportet tona, me shtetet veç e veç”, ka thënë Osmani.
