Presidentja e Kosovës, Vjosa Osmani, ka folur pas paralajmërimit të protestës së Organizatës së Veteranëve të Luftës së UÇK-së më 7 gusht, e cila është thirrur në kundërshtim të veprimeve të Gjykatës Speciale.
Në një deklaratë për media, Osmani e cilësoi jashtëzakonisht shqetësuese pranimin e provave të prodhuara nga shteti i Serbisë nga ana e kësaj gjykate, duke theksuar se ato janë historikisht të falsifikuara dhe për qëllim kanë rishkrimin e historisë së luftës së UÇK-së.
“Nuk ka asnjë përpjekje që mund ta njollosë luftën e drejtë çlirimtare të UÇK-së dhe popullit të Kosovës. Ka qenë luftë për të mbrojtur nga forcat gjenocidale të Millosheviqit,” deklaroi Osmani.
Ajo tha se është fat i keq që edhe sot, pas kaq vitesh, Serbia udhëhiqet nga strukturat e mbetura të regjimit të Millosheviqit, të cilat sipas saj, vazhdojnë të përdorin të njëjtat metoda të manipulimit dhe dezinformimit.
Presidentja u bëri thirrje institucioneve, qytetarëve dhe mbarë popullit shqiptar që të qëndrojnë të bashkuar në mbrojtjen e vlerave të luftës së UÇK-së.
“Duhet të gjithë ne, si institucione, si popull, si komb, t’i bashkojmë forcat tona në mbrojtjen e luftës së drejtë dhe çlirimtare,” përfundoi ajo.
