Një prokuror në Stamboll ka vendosur në paraburgim tetë gazetarë, duke anuluar vendimin për lirimin e tyre.
Gazetarët u arrestuan për mbulimin e protestave më të mëdha antiqeveritare në Turqi ndër vite.
Ata ishin mes 10 të arrestuarve nga bastisjet në shtëpitë e tyre në fillim të kësaj jave.
Një gjykatë e Stambollit fillimisht vendosi që gazetarët të liroheshin përpara se të ndryshonin vendimin dhe të lëshonin një urdhër zyrtar arresti, sipas avokatëve dhe përfaqësuesve të tyre, raporton The Guardian, transmeton Gazeta Enigma.
Midis të arrestuarve janë Yasin Akgül i Agence France-Presse (AFP) dhe ish-fotoreporteri i AFP-së Bülent Kılıç.
Ata po mbahen pasi fotografuan demonstratat masive antiqeveritare që kanë përfshirë Turqinë për herë të parë në vite, të nxitura nga arrestimi i kryebashkiakut të Stambollit, Ekrem İmamoglu javën e kaluar.
Ata të gjithë po akuzohen për “pjesëmarrje në mitingje dhe marshime të paligjshme dhe dështim për t’u shpërndarë pavarësisht paralajmërimeve”, treguan dokumentet e gjykatës. Vendimi i gjykatës u cilësua si “skandaloz” nga “Reporterët pa Kufij”, teksa Unioni i Fotoreporterëve Turk e ka denoncuar atë si “të paligjshëm, të pandërgjegjshëm dhe të papranueshëm”.
Imamoglu është një rival i gjatë i presidentit turk, Recep Tayyip Erdogan, dhe kandidati i vetëm që shihet si i aftë për ta sfiduar atë në kutinë e votimit në zgjedhjet e ardhshme.
Në të njëjtën ditë kur Imamoglu u arrestua edhe zyratrisht, ai është emëruar gjithashtu si kandidat presidencial nga Partia e tij Republikane Popullore opozitare.
Demonstratat që filluan jashtë bashkisë së Stambollit janë rritur me shpejtësi, teksa dhjetëra mijëra mblidhen çdo natë për të shprehur zhgënjimin e tyre ndaj dekadave të sundimit të Erdoganit dhe partisë së tij për Drejtësi dhe Zhvillim (AKP).
Protestat kanë marrë një reagim gjithnjë e më të ashpër nga autoritetet turke. Ministri i Brendshëm turk Ali Yerlikaya, ka thënë se 1,418 persona janë arrestuar në lidhje me demonstratat. /Gazeta Enigma
